PDEA, PRO-7 maayo ang ilang relasyon

CEBU, Philippines — Gitataw sa Philippine Drug Enforcement Agency-7 nga wala maguba ang relasyon tali nila sa Police Regional Office-7 taliwa sa mga pagduda nga polis ra sab ang nitira sa ilang ahente nga si Von Rian Tecson sa Dakbayan sa Carcar niadtong Agosto 8.

Atol sa 888 News Forum sa Marco Polo Plaza kagahapon, gipadayag sa tigpamaba sa PDEA-7, Leia Albiar, atubangan sa mga opisyal sa PRO-7 nga masaligon gihapon sila sa imbestigasyon sa kapolisan.

“We have high confidence and trust in the process of investigation. Salig gyud mi sa integrity sa investigation,” matud ni Albiar.

Nitambong sab sa maong forum sila si PRO-7 Deputy Director for Operations, Senior Supt. Angelito Dumangeng, ug PRO-7 spokesperson, Supt. Reyman Tolentin.

Unang gibanhigan patay ang ilang assistant chief for operations nga si Baby “Earl” Rallos niadtong Hulyo 27.

Ang tigpamaba sa Cebu Provincial Police Office ug tigpamaba sab sa Special Investigation Task Group Tecson nga si Supt. Janette Rafter nagkanayon nga wala pa nila matumbok kun aduna bay koneksyon ang kamatayon sa duha ka ahente.

“We will coordinate with the investigation conducted by the CCPO (Cebu City Police Office) on the shooting of PDEA agent Rallos. As of now we focus on the investigation sa shooting ni PDEA Tecson,” si Rafter nagkanayon.

Ang pagpusil patay kang Tecson natayming sab sa pagkalandig ni SPO1 Roderick Balili sa Cebu South General Hospital sa Dakbayan sa Naga una pa gibalhin sa Dakbayan sa Sugbo human giingonG naunay sa pusil sa operasyon sa Lungsod sa Pinamungajan hinungdan sa pagduda nga ang polis nalambigit sa krimen.

Sa laing bahin, ang Commission on Human Rights-7 nakasugat karon og kalisud sa ilang kinaugalingong imbestigasyon sa mga kaso sa pagpamusil ilabi na ang kapolisan dili mohatag og investigation report matag higayon nga adunay operation.

Matud ni Leo Villarino, chief investigator sa CHR-7, nga wala silay basehanan kung kinsa ang ilang ipaubos sa imbestigasyon ilabi na walay mga pangalan sa mga operatiba nga nalambigit sa operations.

Sumala pa ni Villarino nga bugtong nilang basehan mao lang ang balita sa mga pamantalaan ug mga sibya sa radyo.

Awhag ni Villarino sa mga tigbalita nga nganlan ang mga nalambigit sa matag police operation aron maoy ilang basehanan sa imbestigasyon.

Si Villarino nitug-an nga lakip sa ilang gisusi karon ang suway nga pagbanhig patay kang Konsehal JessiElou Cadungog ug ang pagpatay kang Tecson. (BANAT NEWS)