Drug rehab program sa Kapitolyo i-institutionalize

CEBU, Philippines — Gitinguha sa Probinsiya sa Sugbo nga ma-institutionalize ang community-based rehabilitation program alang sa mga drug surrenderers sa lalawigan.

Atol sa session sa Provincial Board niadtong Miyerkules, gituki ang ordinansahon alang sa community-based treatment diin ang mga barangay maoy mouna sa pagpatuman niini.

Si Bokal Earl Tidy Oyas, chairman sa PB committee dangerous drugs, maoy nangamahan sa maong ordinansahon diin nagtinguha nga adunay standard nga pamaagi sa rehabilitasyon sa mga nalambigit sa ilegal nga drugas nga mamahimo ra mapatuman sa mga barangay.

Apan ang problema sa mga bokal mao ang pondo niini sanglit base sa giduso nga ordinansahon, ang gasto maggikan sa mga barangay.

Matud ni Bise Gobernador Agnes Magpale nga nabalaka siya tungod kay adunay mga barangay nga gamay ra ang pondo ug posibleng walay magahin alang sa maong programa.

“My worry ang how can barangay implement without funds. Among their priorities masulod kaha ni?” matud ni Magpale.

Siya nagkanayon nga gani pipila sa mga kapitan ang niduol pa sa iyang buhatan tungod kay nangayo og pondo alang sa pipila ka proyekto sa ilang barangay sama sa foot bridge nga kinahanglan itukod.

Ang PB nisugyot usab nga dapat adunay bisan P5 milyones nga pondo nga igahin ang probinsiya alang sa monitoring kun maaprubahan ang maong ordinansahon.

Atol sa session, gi-defer una ang maong ordinansahon sa second reading sanglit kinahanglan pa kini moagi og public hearing. (BANAT NEWS)