Warrant of arrest ni Lim gipaabot
CEBU, Philippines — Ang kapulisan sa Police Regional Office (PRO)- 7 ug Criminal Investigation and Detection Group (CIDG) -7 mipadayag nga andam silang dakpon si Peter Lim kon mogawas na ang warrant of arrest niini.
Si Peter Lim ang usa sa mga gilambigit ni Presidente Rodrigo Duterte nga adunay kalambigitan sa illegal drugs diri sa Central Visayas.
“Of course kung naay warrant then, we will be doing our duty to enforce it,” matod pa sa tigpamaba sa PRO-7 nga si Superintendent Reyman Tolentin. Ang Department of Justice (DOJ) nakakita og basehan aron ipasaka ang kaso ngadto sa korte batok ni Lim, Rolan ‘Kerwin’ Espinosa, Marcelo Adorco, Ruel Malindangan ug uban pa niadtong Biyernes.
Si DOJ acting Prosecutor nga si General Richard Anthony Fadullon nagtuo nga paigo na ang testimonya nga usa si Lim sa giingong supplier niini og shabu. Hinuon, ang hepe sa CIDG nga si Superintendent Lito Patay miingon nga wala pa silay nadawat nga warrant gikan sa kauluhan.
Ang CIDG-7 usa sa gitahasan sa pag-imbestiga mahitungod sa giingong kalambigitan ni Lim sa ilegal nga druga.
Sa laing bahin si Tolentin miingon nga wala silay impormasyon kon wala na sa Sugbo si Lim apan bisan pa niini, ilaha gyud kining pangitaon. (/IBM)(BANATNEWS)
- Latest
