CEBU, Philippines — Gawas sa 40 ka sakop sa Regional Mobile Force Battalion (RMFB) nga gibutang sa Barangay Tangke, Dakbayan sa Talisay, anaa sab ang mga sakop sa Armed Forces of the Philippines.
Apan matud ni Insp. Rene Cerna, deputy chief sa Talisay City Police Station, nga bag-o lang naabot ang RMFB ug ang AFP niadto pang Enero kinsa dili kaayo makita matag adlaw sanglit naglibot-libot kini sa tibuok siyudad.
Siya nagkanayon nga motabang lang sila sa gimbuhaton sa kapolisan sama sa pagpakita diha sa kadalanan aron ang mga kriminal mataha sa paghimo og dautan. Ang presensya sa militar maoy nakabahin sa huna-huna sa katawhan kinsa nagtuo nga sinugdanan na sa martial law.
Si Supt. Marlu Conag, hepe sa kapolisan sa siyudad, nipasabot nga walay angay kabalak-an ang katawhan tungod kay ang ilang gibuhat mao ang pagprotektar kanila batok sa dautang elemento.
Usa sab nga ilang gibantayan ang mga rebelde nga mokalit lang sa pag-ataki. Dili layo ang Dakbayan sa Talisay sa Bohol diin nahitabo ang engkwentro tali sa militar ug sa New People’s Army (NPA). (/GMR)(BANATNEWS)