2 pushers sikop sa joint operation
CEBU, Philippines – Nasikop sa joint buy-bust operation sa kapolisan ang duha ka pusher sa Sitio Guiwanon, Barangay Poblacion, Lungsod sa Compostela pasado alas 11 sa miaging gabii.
Giila ang mga dinakpan nga sila si Kevin Mantos, 18- anyos nga taga Sitio San Antonio, Brgy. Jubay, Lungsod sa Liloan ug Wilfredo Tenon, 43- anyos nga nagpuyo sa Poblacion, Lungsod sa Compostela.
Matud ni SPO2 Jayson Gayo sa Liloan Police Station nga nakadawat sila og mga taho labot sa ilegal nga kalihokan sa duha sa Brgy. Jubay hinungdan nga ilang gipahigayon ang buy-bust operation.
Unang nakigsabot ang mga suspek ngadto sa poseur buyer nga himoon ang transaksyon sa Brgy. Jubay apan giingong nahurot ang ilang suplay hinungdan nga subli silang nagsabot nga adto na lang sila mag-abot sa Compostela.
Nunot sa pagbalhin sa lugar, gibutyag ni SPO2 Gayo nga ilang gisabot ang kapolisan sa Compostela aron matigayon ang joint buy-bust operation hinungdan sa pagkasikop sa duha.
Nasakmit gikan sa mga dinakpan ang tulo ka gagmay’ng pakete sa gituohang shabu ug salapi nga P500 nga maoy gigamit sa poseur buyer.
Ang mga dinakpan kasamtangan karong gibalhog sa prisohan ug nag-atubang na og kaso nga kalapasan sa Republic Act 9165 o Comprehensive Dangerous Drug Act of 2002. (/DILT)(BANAT NEWS)
- Latest
