CEBU, Philippines – Miabot sa 42 ka mga sakop sa Regional Mobile Force Batallion (RMFB) ang gidestino sa Talisay City Police Station sukad kagahapon sa buntag.
Gibutyag ni PSupt. Marlu Conag, hepe sa kapolisan sa Dakbayan sa Talisay nga natubag na gyud ang hangyo sa mga opisyales sa Barangay Tanke nga mabutangan og mga polis ang maong barangay.
Asoy sa hepe nga dugay nang nagsige og reklamo ang barangay officials sa Tanke kalabot sa mga tawo nga magsulod-gawas sa ilang dapit diin ang uban mohimo og ilegal nga kalihukan.
Mapasalamaton usab si Conag nga natuman ang maong hangyo kay ang maong dugang pwersa, daku kaayo kini og tabang sa ilang gimbuhaton.
Matud niya nga ang mga sakop sa RMFB dili lang mopokus sa Tanke kay motabang sab sila sa ilang pagabuhaton nga mga operasyon ug uban pang kalihukan.
Gipasabot usab niini nga dili moabot sa punto nga ilang amigohon ang mga ilegalista kay basin unya og malakip sila niadtong mga nagprotehir sa dautang elemento sa katilingban.
Dugang ni Conag nga posibleng hangtud sa hangtud na nga madestino ang mga sakop sa RMFB ilabi na kon makita ang kalambuan sa lugar. (/DILT)(BANAT NEWS)