Cadungog ug drayber gipasakaan na og kaso

CEBU, Philippines – Gipasakaan na og kasong murder ug frustrated murder sa Criminal Investigation and Detection Group (CIDG) diha sa Cebu City Prosecutors Office ang kagawad sa Barangay Tejero, Jessilou Cadungog ug drayber niini nga si William Macaslang.

Kini kalabutan sa giingong pagpusil patay ni Macaslang kang PO3 Euegene Calumba niadtong Lunes kinsa giingong nisuway pagpamanhig.

Si Chief Inspector Hector Amancia, acting regional chief sa CIDG nagkanayon nga giapil usab og kiha si Cadungog tungod kay adunay saksi nga nakakita nga anaa si Cadungog sulod sa sakyanan atol sa pagpamusil.

Ang kauban ni Calumba nga si Michael Banua mao usab ang gihimong saksi sa kapolisan sa insidente.  Ang kapolisan aduna usab kini bata nga saksi.

Ang direktor sa Police Regional Office (PRO)-7 Debold Sinas mibutyag nga nasuta nila nga adunay 13 ka armas sa lain-laing kalibre si Cadungog.

Samtang ang kampo ni Cadungog gitun-an karon ang pagpasaka og kasong attempted murder ug illegal possession of firearms batok kang Banua.

Nunot niini, si Cadungog makahimong mogamit sa iyang leave of absence sa higayon nga kini matanggong sa detention cell gumikan sa kaso nga iyang atubangon.

Si Ian Kenneth Lucero, legal officer sa Department of Interior and Local Government (DILG)-7 ug pangulo sa Local Government Monitoring and Evaluation Division nitug-an nga makahimo gihapon ang konsehal sa paghimo sa iyang trabaho basta wala lang kini mapriso o kaha makonbikto ug mahimo usab kining mogamit sa iyang leave of absence kong itanggong kini.

Bisan sa maong hitabo, si Gobernador Hilario Davide,III nagkanayon nga nagpabilin siya sa iyang kompiyansa sa kapolisan.

Matud ni Davide nga dili siya gusto nga mo-base sa espekulasiyon gikinahanglan nga adunay tibuok nga imbestigasyon . (Le Phyllis F. Antojado ug Rowena D. Capistrano/BDB)(BANAT NEWS)