CEBU, Philippines — Gikawatan sa iyang cellphone ang usa ka kolektor sa financing company sa ilawom sa flyover sa Tabunok, Dakbayan sa Talisay niadtong Lunes sa hapon.
Ang biktima nga si Isais Acevedo, 36, taga Hipodromo, Siyudad sa Sugbo, niasoy nga aduna siya’y gikaestorya nga kustomer sa cellphone.
Iyang nabantayan nga natangtang ang iyang liston hinungdan nga iyang gibutang ang iyang cellphone sa lingkuranan sa motorsiklo.
Sa iyang pagduko dali sab nga gikuha sa duha ka lalaki nga nagsakay og motorsiklo ang iyang cellphone.
Iya unta kining gukdon apan nadaug siya sa kahadlok nga siya kulatahon sa mga kawatan nga nipaingon sa Barangay Lagtang.
Si SPO1 Achiles Cabando niingon nga dili gyud ka kompiyansahan ang bisan asang lugar karong panahona.
“Sakto ra sab ang gibuhat sa biktima nga wala na nigukod sa mga kawatan,” sigun ni Cabando. (GMR) (BANAT NEWS)