High-profile nagtira kang Rallos

CEBU, Philippines — Gidudahan sa direktor sa Philippine Drug Enforcement Agency 7, Emerson Margate, nga usa ka high-profile nga durugista ang nagpaluyo sa pagpatay sa usa sa ilang ahente nga si Baby “Earl” Rallos.

“Ina-account natin lahat yung cases na hinawakan niya or involved siya sa operation and from that titingnan natin kung sino man ang may capability, kung sino ang may galit sa kaniya dito sa trabaho natin,” matud ni Margate.

Apan taliwala sa nahitabo kang Rallos, matud sa direktor nga hingusgan gihapon nila ang pagpakigbatok sa drugas ug triplihon na nila ang ilang pagmabinantayon sa ilang seguridad.

Nag-inusarang nagmaneho sa iyang Toyota Altis nga awto si Rallos gikan sa buhatan sa PDEA-7 paingon na unta mopauli dihang gibanhigan sa duha ka wala pa mailhing mamumuno kinsa nag-angkasay og usa ka motorsiklo samtang siya natanggong sa trapik sa may dalan Villalon, Capitol Site kilid mismo sa Cebu Provincial Capitol niadtong Biyernes sa hapon.

Giumol na ang Special Investigation Task Group sa Police Regional Office-7 nga gipangulohan ni Cebu City Police Office Director Royina Garma ug nakig-alayon na sa PDEA-7.

Wala kini balibari ni Margate apan aduna gihapon silay himoong lahi nga internal investigation. Gawas sa anggulo sa trabaho, wala buhii sa kapolisan ang anggulo sa posibleng kalambigitan ni Rallos sa drugas sanglit nakakuha ang mga sakop sa Scene of the Crime Operatives og shabu sulod sa glove compartment sa sakyanan niini.

Sumala pa ni Sinas nga 56.9 ka gramo ang gibug-aton sa shabu ug mobalor na og  P640 mil.

Kasamtangan pa nga gihuwat sa PDEA-7 ug PRO-7 ang resulta sa gipahigayon sa PNP Crime Lab nga bullet trajectory ug macro-etching sa sakyanan, autopsy, paraffin test, ug drug ug urine test gikan sa biktima ingon man ang resulta gikan sa PNP Anti-Cybercrime Group sa digital forensic examination sa cellphone ni Rallos aron masubay kun kinsa ang mga nanghulga niini, beripikasyon gikan sa Firearms Explosive Office sa Kampo Crame kun lisensyado ba ang mga armas nga napalgan  sulod sa sakyanan sa biktima.

Assistant chief of operations sa ahensya si Rallos ug kanhi magsisibya sa Dakbayan sa Sugbo ug niadto lang buwan sa Hunyo gipasidunggan kini nga Employee of the Year ug na-promote isip Investigation Agent 3, duha ka lakang na lang para mahimong assistant regional director sa PDEA-7. (BANAT NEWS)