Mabdos, duha ka menor sikop sa drug bust

CEBU, Philippines – Dul-an usa ka milyon ang balor sa shabu nga nasakmit sa managlahing buy-bust operations sa Dakbayan sa Sugbo ug Dakbayan sa Talisay niadtong Miyerkules sa gabii ug Huwebes sa kaadlawon, diin usa sa mga nadakpan duha ka buwang mabdos ug duha ang mga menor de edad.

Didto sa dalan Sanciangko, Barangay Pahina Central, Cebu City  nadakpan sa mga sakop sa Philippine Drug Enforcement Agency-7 ang duha ka mga nag-edad og 15 ug 17 anyos kauban sa usa ka Deither Ocaba ,18, pulos taga Barangay Ermita.

Nasakmit gikan kanila ang duha ka paketeng gituohang shabu nga mokabat og P374 mil. Ang tigpamaba sa PDEA-7 nga si Leia Albiar miingon nga dili mobaligya og ginagmay ang maong grupo. Samtang sa Lower Kawayan, Barangay Sambag Dos, gidakop sa mga operatiba sa Cebu City Police Station 11 ang 37 anyos nga duha na ka buwang mabdos nga si Jennifer Cabatingan ug nakuhaan og lima ka mga medium nga paketeng gidudahang shabu nga mobalor og P295 mil.

Kagahapon sa kaadlawon gidakop sa mga operatiba sa CCPO Police Station 4  sa Sitio Panaghiusa, Barangay Carreta sila si Ceasar Coliflores alyas Nonoy, 45,  ug Norbena Tañeza alyas Vena, 41. Nakuha gikan kanila ang 28 ka gagmay ug upat ka medium ka paketeng shabu. Sa Dakbayan sa Talisay, duha ka supervisor sa usa ka motel ang nasikop sa Sitio Gabon, Barangay Lawaan 2. Ang mga dinakpan giila nga sila si Jay Paradero ug si Marl Loui Maguiwag, parehong supervisor sa inilang motel. Si Supt. Marlu Conag, pangu sa kapulisan sa dakbayan sa Talisay nibutyag nga namaligya sila og shabu sa mga guests sa motel. (Rowena Capistrano ug Gabriel Bonjoc/IBM)(BANAT NEWS)