CEBU, Philippines – Babaye ug lalaki napalgang patay didto sa managlahing lugar sa barangay San Roque, Lungsod sa Liloan nailhan na kagahapon ug giingong manag-uyab ang duha.
Ang babaye nga gituohang gitambog sa bung-aw sa Purok Sandayong 1, sa maong barangay, giila sa Liloan Police Station nga si Jaime Mata,16, alyas Mayang, taga Barangay Tisa, Dakbayan sa Sugbo ug tinun-an sa grade 9 ug positibong giila sa pamilya.
Samtang ang pamilya sa lalaki nga napalgang patay sa Purok Kawasan, 30 metros gikan sa lugar diin napalgan si Mata, miila sa biktima nga si Stephen Del Corro, 26, kanhi call center agent ug residente sa Barangay Tisa.
Ang pamilya ni Del Corro, nakahinabi sa Banat News niingon nga Domingo pa nila katapusang nakit-an ang duha dihang nagkuyog sila padung sa Mabolo luwan sa Mio nga motorsiklo ni Del Corro apan gikan niadto wala na sila nakauli.
Ang hepe sa kapolisan sa Liloan nga si Police Chief Insp. Randy Korret miingon sa Banat News nga wa na nila ma-recover ang giingong motorsiklo sa biktima.
Giingong tulo ka buwan na nga mibalhin og puyo sa Mandaue si Del Corro kay dunay magsunod-sunod niya nga wala siya makaila. Giingong magbisitahan ra kini sa Tisa kay duna kini usa pa ka tuig nga anak sa unang uyab.
Si Korret miingon sa Banat News nga duha ka mga anggulo ilang gisubay, pagkalambigit ni Del Corro sa usa ka fraternity ug love triangle.
Sumala pa ni Korret nga usa ka taas nga opisyal sa ilang fraternity si Del Corro.
"Di rin siguro to drugs kasi parang di sila users kasi makinis sila. Healthy di tulad sa usual na users," matud pa ni Korret.
Pangagpas niya didto gyud gipatay ang duha kay dunay nakadungog og usa ka boto sa pusil sa nahimutangan ni Del Corro ug duha ngadto kang Mata nga nitakdo usab sa ilang mga samad.
Sa laing bahin, nailhan na ang patay’ng lawas sa usa ka lalaki nga nabulit sa daghang samad pinusilan ang kalawasan nga napalgan sayo sa buntag sa Sitio Capasanan, Barangay Casili, Dakbayan sa Mandaue.
Si Police Officer 2 Ryan Diamada sa Presinto 6 sa Mandaue City Police Office (MCPO) nga nahinabi sa Banat News miingon nga ang iyaan sa maong namatay maoy nag-ila niini nga kini iyang pag-umangkon nga si Jarry Yu Llorel, 43, taga Mambaling sa Dakbayan sa Sugbo nga giingong minyo apan buwag na sa iyang asawa.
Giingong dugay na nga nawala didto sa Mambaling ang biktima ug wala usab sila masayod kon hain na kini magpuyo. (Romeo T. Limpangog/IBM)(BANAT NEWS)