Mabatid: 20 police security?

CEBU, Philippines – Di makahatag og 20 ka police escorts si Chief Supt. Debold Sinas, direktor sa Police Regional Office-7 alang kang Mabolo Barangay Captain Prisca Niña Mabatid, kinsa nangangkong nakadawat siya og mga pagpanghulga sa iyang kinabuhi human mipadayag og interes nga modagan isip presidente sa Association of Barangay Captains.

“Twenty ka tao? Di na pwede uy. Among policy duha lang ka tawo. Asa man ta mangita og police nga 20? Basta our policy including the congressmen, mayors, senators is only two,” si Sinas nagkanayon.

Butyag ni Sinas nga bisan pa kanang mga adunay mas taas nga katungdanan moagi gihapon og proseso lakip na ang evaluation sa intelligence unit sa Philippine National Police kon angay ba silang tagaan og police security.

Apan matud niya kon aduna gyuy specific order gikan sa taas iya kini ipasa sa kampo Crame.

Ang hepe sa Mabolo Police Station nga si Senior Insp. Dindo Juanito Alaras mikompirmar nga nagpa-blotter si Mabatid pinaagi sa iyang representante bahin sa hulga.

“Di man personally (siya niadto) nagpadala siya og representative together with his administrator, nagpa-blotter nga she’s receiving text messages.

Naa may gipakita pud nga mga screenshot sa text messages,” matud sa maong hepe apan wala na kini mibutyag kun unsay unod sa maong mga pagpanghulga.

Si Mabatid ang gikatahong gi-endorsar sa Office of the President nga modagan pagka ABC president puli kang Tisa Barangay Captain Philip Zafra.

Atbangan kini sa manok sa Bando Osmeña Pundok Kauswagan (BOPK) nga si Franklyn Ong, kapitan sa barangay Kasambagan, Dakbayan sa Sugbo.

Si Mabatid miingon nga ang OP mitanyag kaniya og 20 ka police personnel aron mobantay sa ilang seguridad apan wala niya kini dawata. Apan duna na siyay gipasa nga pangalan sa mga polis nga iyang kasaligan. (Decemay Padilla/IBM)(BANAT NEWS)