2 mini-bus operators giisyuhan og show cause order

CEBU, Philippines — Gipadad-an na og show cause order sa Land Transportation Franchising and Regulatory Board ang tagdumala sa duha ka mini-bus operators nga nakasugat og disgrasya sa Magay, Compostela niadtong Hulyo 14.

Ang hearing gikatakda karong Miyerkules sumala pa ni LTFRB-7 Director Ahmed Cuizon.

Matud ni Cuizon nga ang pagpahigayon og hearing dili aron sa pagpangita nila sa mga lapso sa nahitabong disgrasya kung dili aron sa pagtan-aw nila kung angayan pa ba ang mga operators sa ilang gihuptan nga mga prangkisa.

Sumala pa ni Cuizon nga atol sa hearing mahimo sab nga mopatim-aw ang mga nahimong biktima sa disgrasya diin mahimo silang mopaambit sa ilang mga panahom o mga panginahanglanon aron ila kining matuki.
Kahinumduman nga duha ang patay diha-diha dayon ug upat ang naangol atol sa disgrasya dihang ang traysikol nga gisakyan sa mga trabahante sa usa ka dakung kompaniya sa Dakbayan sa Danao ang nakasugat sa disgrasya. (BANAT NEWS)