CEBU, Philippines — Luwas na sa makuyaw nga kahimtang si Senior Police Officer 2 Armando Lozano human kini gipusil sa wala mailhing mamumuno sulod sa Labangon Bliss Elementary School niadtong Huwebes.
Matud sa usa sa mga anak ni Lozano kinsa dili magpaila alang sa seguridad niini nga malipayon sila nga luwas ra sa makuyaw nga kahimtang ang iyang amahan.
Mapasalamaton sab ang maong anak nga walay nakalas o naangol sa mga tinun-an ug ginikanan ilabi na nga dunay induction sa mga opisyal sa Parents-Teacher’s Community Association sa maong tunghaan dihang nahitabo ang pagpamusil.
Wala pa masayud ang anak sa motibo sa pagpusil sa iyang amahan apan nabalaka ug nahadlok sila sa ilang kinabuhi human sa hitabo ug nasubo usab sila human giukay ang kanhi mga panghitabo nga nasulbad na ug gikonektar sa insidente.
Giangkon sa anak nga daghan og nadawat ang iyang amahan nga pasidungog dihang aktibo pa sa pagkapolis ug andam kini sa pagtabang sa katawhan ug gani gipili kini nga presidente sa PTCA sa maong tunghaan tungod sa pagsalig sa katawhan kaniya.
Gibutyag sa anak nga padulong na unta ibalik sa serbisyo ang iyang amahan human naabswelto sa kaso. Si Lozano sa dihang wala kini sa serbisyo nalingaw sa pag-atiman sa manok.
Ang anak nitug-an nga tuig 1990 pa sila nakadungog nga drug lord ang iyang amahan hinungdan nga iyang giawhag nga susihon sila og klaro ug i-check sila og klaro tungod kay mismo ang ilang balay gubaon ug lata na tungod kay bahaan.
Awhag sa anak sa kapolisan nga paladman ang imbestigasyon. (/GMR)(BANATNEWS)