Nidagit sa 15 anyos gidakop

CEBU, Philippines – Gitanggong sa sulod sa detention cell sa Bantayan Police Station ang usa ka 22 anyos nga lalaki  tungod  sa kaso nga iyang giatubang nga consented abduction.

Si Police Chief Inspector Florendo Laude Fajardo nga maoy hepe sa Bantayan Police Station nangulo sa pagdakop  kang Emilio Jamili Payao diha sa  panimalay niini sa Sitio Pangpang, Barangay Lipayran. Ang pagdakop sa maong suspetsado subay sa  warrant of arrest nga giluwatan  ni Judge Jennifer Singco, presiding judge sa Regional Trial Court  (RTC) 7  sa Branch 79  sa Dakbayan sa Bogo.

Gipasaka ang kaso batok sa maong suspetsado sa korte  tungod sa pagdala niini sa 15 anyos nga dalagita  niadtong Oktubre 21 sa tuig 2017.

Giingon sa asoy sa reklamo sa mga ginikanan sa 15 anyos nga dalagita nga gipahibalo na lamang sila nga gikuha niini ang ilang anak ug gidala sa ilang pinuy-anan. (/IBM)(BANAT NEWS)