CEBU, Philippines — Nipahimangno ang pangulo sa City Health Office sa Talisay nga likayan ang mga street foods aron malikay sa mga sakit-sakit.
Si Dr. Lino Alanzado nitataw nga karong panahon sa ting-uwan hayan manggawas ang mga sakit sama sa trangkaso, hilanat, sakit sa panit, tipos ug uban pa.
Gani ang makamatay nga sakit nga dengue mao sab ang ilang gibantayan. Apan ang pagkaon nga gihimo daplin sa karsada ang angayan sab nga likayan tungod kay abog na kining daan ug wala sab mahibaw-i kun limpyo ba nga kagamitan ang gigamit sa nagluto niini.
“Mao ra ba ni paborito sa mga bata ilabi na diha sa gawas sa ilang mga tunghaan,” matud ni Alanzado.
Tambag niya sa mga ginikanan nga dili pabawnan og kwarta ang ilang mga anak sa tunghaan kun dili lutoan gyud og mga pagkaon nga sustansyado nga makabusog.
Makig-alayon sab sila sa Department of Education aron ma-edukar ang kabataan ug kun mahimo lakip na ang mga ginikanan. GMR (BANATNEWS)