Mayor Esgana gipasakaan og mga kaso

CEBU, Philippines — Gipasakaan og daghang mga kasong kriminal sa usa ka ginang si Sta. Fe Mayor Jose Esgana sa isla sa Bantayan may labot sa kamatayon sa anak niini.

Kasong perjury, obstruction of justice ug ingon man kalapasan sa anti-graft and corrupt practices act ang gipasaka ni Josefina Delima nga giabagan sa abogado niining si Atty. Judiel Pareja. Ang kaso diha gipasaka sa Office of the Ombudsman niadtong Hunyo 29, 2018.  Si Josefina mao ni ang inahan ni Gilbert Delima kansang patay lawas giingon giguyod sulod sa gate ni Esgana niadtong Mayo 2016.

Sa complaint affidavit ni Josefina, iyang gisaysay nga ang mga tawo ni Esgana maoy niguyod sa patay nga lawas ni Gilbert sulod sa gate sa mayor samtang ang suspek nga si Pablo Paul Escarlan nibiya sa crime scene.

“.. Some men of Mayor Esgana dragged the body of my son inside the residence of Mayor Esgana in the latter’s presence,” matud ni Josefina sa reklamo.

Matud pa nga wala gani motawag si Esgana sa kapolisan aron masikop si Escarlan.  Niadtong Agosto 24, 2016, ang National Bureau of Investigation (NBI-7) nipasaka og kasong murder batok ni Escarlan ug Joanes Paulo Esgana didto sa Provincial Prosecutor.

Sa pagpasaka og kaso, si Mayor Esgana nahimong saksi ug mi-execute sa iyang affidavit nga nagsaysay nga samtang nag-estoryahanay  sila sulod sa ilang panimalay sa barangay Talisay lungsod sa Sta. Fe nakadungog na lang  sila og boto gikan sa    gawas.

Apan di motoo si Josefina sa pamahayag sa mayor ug siya mipasangil nga gipanalipdan sa mayor ang iyang anak nga si Paulo ug si Escarlan.

“Clearly the statements of Mayor Jose B. Esgana, were perjured to ensure that his son and brother-in-law will avoid prosecution for their wrongful acts,” matud ni Josefina sa iyang affidavit.

Ang kampo ni Josefina nipadala usab kini sa supporting affidavit sa ilang saksi sa krimen nga si  Jake Hijapon kinsa nisaysay nga iyang nakit-an si Escarlan nga nipusil ni Gilbert lima ka higayon ug human sa pagpamusil iyang nakit-an si Mayor Esgana nga nagbarog atubangan sa lawas sa biktima nga giguyod kini padulong sa pinuy-anan sa mayor.

“I thought that he will arrest or order someone to arrest the perpetrator of the crime but he did not. He allowed Pablo Paul Escarlan to leave the crime scene,” matud ni Hijapon.

Matud pa ni Hijapon human nakasohan sa NBI silang Escarlan ug Paulo may mga armadong lalaki nga gituohang tawo sa mayor ang nangita kaniya  didto sa Kinatarkan, lungsod sa Sta. Fe.

Ang reklamanteng ginang miingon nga pulos bakak ang mga pamahayag sa mayor.

"I welcome the move of Mrs. Josefina Delima. It is her right as a citizen and as an aggrieved mother to fight for justice for his son. As everybody knows, the case has already been filed, initially resolved and its running in the courts. It is also right for me to answer all these at the proper forum," tubag sa text ni Mayor Esgana. (BANAT NEWS)