11 ka bata nalanag sa tuba-tuba

CEBU, Philippines – Nangalanag ang 11 ka tinun-an sa ilang gikaon nga bunga sa tuba-tuba atol sa ilang pagpaniudto niadtong Martes sa Barangay Montañeza, Lungsod sa Malabuyoc.

Ang mga biktima mao ang walo ka tinun-an sa grade 3 nga nag-edad og 8 ug 9-anyos; duha sa grade 4 nga nag-edad sab og 8 ug 9-anyos, ug usa ka 11-anyos nga tinun-an sa grade 6 kinsa gidala sa Mariano Jesus Cuenco Memorial District Hospital sa maong lungsod.

Sigun pa sa imbestigasyon ni PO1 Leonardo Olores Jr. nga tingpaniudto nanggawas ang maong mga tinun-an gikan sa ilang tunghaan sa Montañeza Elementary School paingon sa baybayon nga gibana-banang 50-metros ang gilay-on.

Matud pa niya nga unang nakamatikod ang 11-anyos nga batang babaye sa nangatagak nga bunga sa tuba-tuba ug gipanghatag sa ubang mga tinun-an nga anaa sa maong dapit.

Giingong gipanguhit pa nila ang ubang bunga niini ug gipangaon.

Alas 2 ang takna samtang nagsugod na ang ilang klase, nagmulo na sa kasakit sa ilang mga tiyan ang mga bata ug gidala dayon sa tambalanan.

Nasubay nila nga ang bunga sa tuba-tuba ang katapusan nilang gipangaon sa wala pa nagsakit ang ilang mga tiyan.

Niining pagsuwat, anaa na sa luwas nga kahimtang ang maong mga bata.

"Gi-estoryahan na man sa prinsipal ang mga ginikanan nga pahinumduman gyud ilang anak nga dili magpataka og kaon. Sa mga estudyante sad, lesson learned na ni nila," dugang pa sa maong imbestigador. (/GMR)(BANAT NEWS)