Balili property paliton sa Naga

CEBU, Philippines – Ibaligya sa Probinsya sa Sugbo ang kontrobersyal nga Balili property ngadto sa lokal nga kagamhanan sa Dakbayan sa Naga og P100 milyones sigon pa ni Mayor Kristine Vanessa Chong. Si Davide mihatag na sa draft sa memorandum of agreement (MOA) alang sa pagbaligya sa dili momenus 24 ka ektarya nga luna sa mga Balili diha sa dakbayan sa Naga.

Matud ni Chong nga ila pang i-review ang maong MOA ug tan-awon usab ang ubang dokumento nga kinahanglan alang sa tinguha nga mapalit ang maong property. Si Davide nagkanayon nga maghulat pa usab sila sa tubag sa Dakbayan sa Naga kalabot sa draft MOA nga ilang gisumiter aron nga makahan-ay usab sila og laing meeting paghisgot niini.

Ang Balili property nahimong kontrobersyal human kini gipalit sa Kapitolyo kaniadto og sobra P99 milyones base sa deed of sale apan nasayran nga adunay pipila ka parte sa luna ang naglubog sa tubig  nga di unta angay mapatitulohan.

Ang maong kontrobersya naabot na ngadto sa Sandiganbayan diin apil sa mga gikasohan mao si kanhi gobernador ug karon Kongresista Gwendolyn Garcia ug uban pang mga opisyales sa Kapitolyo kaniadto. (/IBM)(BANAT NEWS)