V-Hire Terminal di na sirad-an

CEBU, Philippines – Tungod sa hangyo ni Cebu Governor Hilario Davide III dili na ipadayon ni Cebu City Mayor Tomas Osmeña ang pagpasira sa V-Hire Terminal diha sa Barangay Kamagayan ning dakbayan.

Kini maoy gipahibawo sa mayor pinaagi sa iyang post sa Official Facebook Page niini nga matod pa nanawag kaniya ang Gobernador ug miingon nga daghan sa mga konstituwente niini ang nakabenepisyo sa maong terminal.

Hinoon, giklaro ni Osmeña sa iyahang post nga dili na niya tugotan nga makabalik  diha sa terminal ang gitawag niya nga ‘abusive management.’

Ang terminal pagadumalaon na sa Barangay Mayor’s Office nga gipangulohan ni Rolando Pilapil.

Kini aron pagsiguro nga ang mga drivers dili pugson nga mokaon matud pa sa ‘management’s carenderia’ o kaha magpa-gasolina sa usa lamang ka gipaborang gasolinahan.

“Team Suyop has filed a case against me for Kamagayan, but since Gov. Junjun says it helps many Cebuanos, it is worth keeping open. Besides, the Cebuanos matter more than Team Suyop,” tipik sa post ni Osmeña sa iyahang Facebook page.

Subay niini, si Douglas Labra sa iyang bahin nagpasalamat ug nalipay kaayo nga dili idayon sa mayor ang  bahad pagpasira sa terminal kay padayon nga mabulahan ang mga pasahero.

Wala usab problema kang Labra nga ang BMO na maoy modumala sa terminal.

“Naay kalamboan kay kana man gud terminal sayon ra kaayo na dad-on first in-first out ra man na, so malambo gyud na. Wala’y lisod anang terminal, mao ra gyuy palisiya ana, kinsay pirmiro maabot mao say moguwa, mao ra gyud na,” asoy ni Labra. (/IBM)(BANAT NEWS)