CEBU, Philippines — Gipanglantawan ni Bise Mayor Alan Bucao sa Syudad sa Talisay nga ang iyang asawa na gyud nga kapitan sa Barangay San Isidro ang mahimong presidente sa Association of Barangay Council (ABC).
Matud pa niya nga gisaaran na ang iyang asawa nga si Marietta “Yehyen” Bucao nila ni Kongresista Gerald Anthony “Samsam” Gullas ug ni Mayor Eduardo Gullas sa mao nga posisyon.
Samtang siya pabilin nga bise mayor ubos sa partido sa batan-ong Gullas kay si Eddiegul mobalik naman sa kongreso.
Matud pa ni Bucao nga sa una pa gyud ganahan mag-ABC president ang iyang asawa apan kay nitamod sa kasabutan sa Alayon nihatag kini og kahigayunan ni ABC president Raul Cabañero nga maoy gituboy sa partido.
Nasabtan ni Bucao nga ang third termer ug loyal nga kapitan sa partidong Alayon tagaan og kahigayunan sa maong posisyon.
Si Kapitan Bucao napili sa miaging eleksyon sa barangay ug mao na kini ang iyang katapusang termino. Ang mga Bucao nahimong loyal sa partidong Alayon.
Apan ang kasaligang tinubdan nisumbong nga dili pa gyud kasiguro ang mga Bucao tungod kay aduna may duha ka pangalan sa nakadaug nga mga kapitan nga interesado sab sa maong posisyon.
Nitumaw ang pangalan ni kanhi konsehal sa Syudad Edward Alesna nga maoy napiling kapitan sa Poblacion ug ni Cuenco Manreal nga consultant sa mga Gullas nga nakabalik pagkakapitan sa Pooc. (BANAT NEWS)