CEBU, Philippines – Giandam na daan ni Konsehal Eugenio Gabuya Jr. ang pagduso pagbalik sa iyang ordinansahon nga magtugot sa mga traffic enforcers sa CITOM nga makasakmit og lisensya bisan og walay TOP.
Niining higayona, gilauman ni Gabuya nga molampos na gyud siya pagpapasar sa isugyot niyang ordinansahon nga sa dugay’ng panahon wala gyud uyoni sa mga konsehal nga alyado sa Team Rama.
Gusto ni Gabuya nga magmugna ang dakbayan og ordinansa aron nga makasakmit na og lisensya ang CITOM enforcers ug sa ingon nga paagi, mahadlok na gyud ang mga driver nga mohimo’g kalapasan sa balaod sa trapiko.
Ang mga konsehal sa Team Rama mikutikuti sa pagpasar sa maong ordinansa kay nabalaka sila nga moabuso unya ang mga sakop sa CITOM.
Kon maaprobahan ang maong ordinansa sa mayoriya na unya nga mga konsehal sa BOPK, mapugos na gyud ang mga driver nga mosunod sa balaod. (RUB)(BANAT NEWS)