CEBU, Philippines — Makahatag og kasayon sa mga tinun-an sa College Hospitality Management Department sa Lapu-Lapu City College ang mokabat sa P2 milyones nga kantidad nga kitchen laboratory ug mga kagamitan sa pagpangluto.
Ang mga nagdumala sa Mactan Island Resort and Casino pinaagi sa ilang Mactan Isla Cares Foundation midonar sa maong mga gamit ngadto sa maong tunghaan. Ang turnover ceremony gitambongan sa mga kadagkoan sa maong tulunghan uban usab ni Lapu-Lapu City Mayor Paz Radaza ug opisyales sa dakbayan.
Si Radaza miingon nga dako kaayo kini og matabang sa pagtuon sa mga estudyante sa maong kolehiyo nga nagkuha og kurso may kalambigitan sa pagdumala og mga hotels ug kan-anan.
Si Mactan Isla Resort and Casino executive director Son Byung Cheon nanghinaut nga molungtad og dugay ang maong mga kahimanan aron daghang mga tinun-an ang makapahimulos ug mahimong malampuson sa ilang pagtungha.
Si Radaza mipasalamat ug midayeg sa nagdumala sa maong resort nga mitabang sa maong tulunghaan. Ang Lapu-Lapu City College adunay 230 ka mga tinun-an nga nagkuha sa kurso nga Hospitality Management ug maoy labing unang makapahimulos sa maong mga kahimanan. (BANAT NEWS)