CEBU, Philippines — Buot gihapon magpapili sa pagka-mayor sa Dakbayan sa Talisay si kanhi mayor Johnny V. de los Reyes nga naila nga si JVR sunod tuig nga piniliay.
Kini bisan nakuha na sa Partidong Alayon ang tanang kapitan sa 22 ka barangay sa siyudad sa niaging eleksyon. Giingong naghinay-hinay na sa pagpatapok si de los Reyes sa iyang mga lider apan wala pa matino ang kaubanan gawas sa anak niini nga si kanhi city administrator John Yre de los Reyes kinsa naglaraw sa pagpapili sa pagka-konsehal.
Kadaghan na nagpapili si de los Reyes apan niadtong 2013 iyang napukan ang beteranong politiko ug kanhi kongresista nga si Talisay City Mayor Eduardo Gullas.
Apan sa subli nilang panagsangka sa 2016 napilde na sab ni Gullas si de los Reyes.
Si de los Reyes nitug-an sa Banat News nga iya lang una paminawon ang dagan sa panahon kun aduna pa bay Talisaynon nga ganahan sa iyang serbisyo. (/GMR)(BANATNEWS)