IDMB wala na ganahi moimbestigar sa kaso

CEBU, Philippines — Ang kapolisan sa dakbayan sa Sugbo dili na moimbestigar sa nahitabo nga pagpatay sa usa ka tawo nga mopayuhot unta og mga kontrabando sa Cebu City Jail nga gipusil sa usa ka jail guard kaniadtong Martes sa udto.

Ang hepe sa Investigation and Detective Management Branch (IDMB) sa Cebu City Police Office nga si Supt. Ryan Devaras, miingon nga bahala na ang Bureau of Jail Management and Penology (BJMP) nga moimbestigar sa kaso.

Matud sa kadagkoan sa BJMP nga si Jail Officer-1 Myron Garcia nga maoy nakapatay ni Edilberto Edlisan, 19, nga taga Lapu-Lapu City, nga mopayuhot unta og daghang kinarton nga sigarilyo ug ubang kontrabando, igo lang mituman sa iyang katungdanan.

Ang kauban ni Edlisan nga napusilan usab sa bitiis anaa pa sa tambalanan. Si JO1 Garcia giparelibohan na gikan sa Cebu City Jail pinaagi sa kamandoan ni BJMP-7 Regional Director Arnold Buenacosa ug gibalhin sa regional office.

“It’s a strong message already to stop their illegal activity,” mensahe ni Buenacosa ngadto sa mga gustong mopayuhot og kontrabando sa bilanggoan.

Samtang si Mayor Tomas Osmeña andam mohatag og legal assistance sa jail guard kon pasakaan siya’g kaso sa kabanayan sa iyang napatay ug nasamdan.

Nagkanayon si Osmeña nga kon ang usa ka tawo mohimo og ilegal ug dili gusto nga mo-surrender, angayan lang kini nga sumpuon.

Makadaghan na nga higayon nga ang mga guwardiya sa Cebu City Jail napalutsan og mga kontrabando. Ang paagi unta sa maong mga napusilan nga ipalusot nila ang mga sigarilyo pinaagi sa kakunsabo nila nga piniriso nga maoy mobitad ngadto sa ibabaw agi sa kural sa mga pinutos nga kontrabando.

Si JO1 Garcia nakasigpat sa gihimo sa duha ka tawo samtang didto siya nagbantay sa usa sa mga tower sa bilanggoan. (Camille L. Pateres/RUB)(BANATNEWS)