12-anyos, 500 bombero gipasidunggan

CEBU, Philippines — Mosobra 500 ka mga bombero ug barangay  fire volunteers sa Sugbo apil  ang usa ka 12-anyos nga niluwas sa iyang mga manghod ang gipasidunggan atol sa awarding ceremony  sa "The Modern Day Heroes of Metro Ayala Fire” kagahapon sa hapon diin mismo si OIC-DILG secretary Eduardo Año ang pinasidunggan nga dinapit.

Matud pa ni Año dako iyang pasalamat sa tanang mga kabomberohan nga andam mosakripisyo sa ilang kaugalingon aron maluwas ang uban.

Si Año miisip usab sa mga barangay fire volunteers sama sa mga sakop sa Bureau of Fire Protection nga bayani usab kay bisan og wala silay klarong mga sweldo miserbisyo sila aron maluwas ang mga kabtangan ug nasunogan.

Malipayon si Año, nipahibalo nga nindot ang response sa nahitabong sunog sa Ayala tungod kay napakita sa mga Sugbuanon ang bayanihan kay daghan ang nitabang pinaagi sa paghatag og makaon ug tubig sa mga bombero.

Gidayeg usab ni Año ang regional director sa BFP nga si Senior Supt. Samuel Tadeo kinsa adtong hitabo maoy nangulo sa imbestigasyon sa nasunog nga NCCC Mall didto sa Davao City apan nahimo gihapon niini pagdumala iyang mga tawo sa Sugbo.

Sa laing bahin, gipasalamatan ug gidayeg ni Año  ang 12 anyos nga si Geraldine Castillano kinsa niluwas sa iyang lima ka mga manghod atol sa sunog sa dakbayan sa Lapu-Lapu nga gikamatay usab sa manghod niini. Nadawat ni Castillano, ang cash, plaque ug groceries. (/IBM)(BANATNEWS)