Langyaw nasaag og kwarto gidakop

CEBU, Philippines – Gidakop ang Australiano kinsa nisulod sa kwarto sa duha ka babaye sa usa ka pension house sa Kamputhaw, Siyudad sa Sugbo kagahapon sa kadlawon.

Giila ang suspek nga si Kirk Ian Bradly, 49, lumad taga Sydney, Australia ug kasamtangang nagpuyo sa maong pension house.

Giingong hubog ang langyaw dihang nisulod sa silingan niining kwarto nilang Maria Kristina Uy, 30, taga Caloocan City ug Yugananda Quiliza, 46, taga Muntinlupa City.

Nasuta nga wala na-locked sa mga babaye ang ilang lawak hinungdan nga sayon ra nga nakasulod ang langyaw.

Namat-an na lang nila ang langyaw kinsa naghukas hinungdan nga daling gisumbong ug gidakop.

Kasamtangang gitanggong sa estasyon sa kapolisan ang langyaw alang sa sunod nga lakang nga himoon. (/GMR)(BANAT NEWS)