Nasunogan sa Lorega walay kabutangan
CEBU, Philippines – Kulang ang siyudad sa Sugbo og relocation sites matud pa sa Division head sa Division for the Welfare of the Urban Poor (DWUP) nga si Miriam Consuelo Fernandez.
Kahinumduman nga 400 ka residente ang apektado sa sunog sa Sitio Riverside, Barangay Lorega San Miguel niadtong Mayo 21 ug nahibaw-an nga pribado diay ang maong luna. Si Fernandez miingon nga gusto sa tag-iya nga kuhaon na ang luna apan iya kining giawhag nga makigsabot una sa mga residente ug mopasaka og ejectment case kung ganahan gyud kini nga di pabalikon ang mga residente sa ilang yuta.
"Di man gud ‘ta makapugos sa mga tawo nga mopahawa especially if wala tay kabalhinan," sigon ni Fernandez. Sa pagkakaron, pwede pang mobalik og tukod og panimalay ang mga residente sa maong luna.
Ang 64 anyos nga biktima sa sunog nga si Rogelio Buanjog kinsa adunay siyam ka anak ug paralisado ang asawa miingon nga magtukod lang una sila og barong-barong kay wa silay laing kapadulngan.
Hangtud ning pagbalita, wala pa makadawat sa pinansyal nga hinabang gikan sa siyudad ang mga nasunogan sanglit padayon pa ang proseso sa pagsusi sa kon kinsa ang mga biktima. (/IBM)(BANAT NEWS)
- Latest
