CEBU, Philippines – Gipangandaman na sa Department of the Interior and Local Government (DILG) ang umaabot nga Sangguniang Kabataan (SK) Federation Elections nga ipahigayon karong Mayo 28-29, 2018.
Si Joy Calvo, pangulo sa Cebu City DILG, nagkanayon mahitabo ang oryentasyon inig Mayo 28 ug ang eleksyon ipahigayon sa Mayo 29 apan iyang giangkon nga nagkaproblema pa sila sa venue.
Gipaabot nga motambong ang 80 ka SK chairpersons sa 80 ka barangay sa maong eleksyon. Kadtong dili motambong mahimong makasohan og dereliction of duty sa DILG.
Motambong sab ang magdumala sa eleksyon sama sa Board of Election Supervisors nga sila si Emma Joyevelyn Calvo, pangulo sa DILG, Sangguniang Panlungsod (SP) Secretary Roy Vincent Alix ug usa ka representante sa Commission on Elections (COMELEC). Aduna sab Board of Observers nga sila si Mayren Cogtas gikan sa Dilaab Foundation Inc., PSINSP Dindo Juanito Alaras sa Cebu City Police Office (CCPO) ug Dr. Alexander Franco Delantar, DM Dean College of Management, Business and Accountancy sa Cebu Institute of Technology-University (CIT-U).
Sa panaghinabi ni Jessica Resch, SK Chairman sa Barangay San Nicolas Proper ug usa sa midagan isip presidente sa SK Federation, mapasalamaton siya nga usa siya sa giila ni Mayor Tomas Osmeña nga dako og potensyal.
“It’s a blessing nga nakit-an ko and I’m very thankful nga I’m one of the bet nila,” sigun pa niya. (/IBM)(BANAT NEWS)