Gipangdunggab sa kainom angol
CEBU, Philippines — Nangasamdan ang upat ka batan-on sa managlahing insidente sa pagpanunggab niadtong Domingo sa kaadlawon sa Dakbayan sa Sugbo.
Sa Barangay Duljo Fatima, tulo ka lalaki ang samdan nga giila nga sila si Joshua Cardenas De Jesus, 17; Jacx Harry Mission Samonte, 18, ug John Reich Tiro Aton, 17, human gidunggab sa buak nga botelya sa beer sa ilang kainom.
Ang suspek mao si Harrel Cañete Tormis, 17, kinsa giingong kalit lang nidunggab sa kamot, ulo ug bukton sa mga biktima gumikan sa kahubog.
Daling gidala sila si De Jesus, Samonte, ug Aton sa Cebu City Medical Center samtang si Tormis ang gitugyan sa Department of Social Welfare and Development sa Barangay Labangon gumikan kay menor de edad.
Laing insidente sa pagpanunggab nahitabo sa TJ Bar, sa Barangay Punta Princesa diin ang biktima giila nga si Jefferson Labitad, 20, samtang ang suspek giila nga si Jemar Llanos, helper sa usa ka silogan atbang sa nahisgutang bar.
Nalandig sa Cebu City Medical Center si Labitad samtang si Llanos nakasibat. - Rafols E. Gervacio, CNU Intern (BANAT NEWS)
- Latest
