CEBU, Philippines – Gikatahong 11 ka piniriso sa Talisay City Jail sa dakbayan sa Talisay ang nataptan og tuberculosis (TB) ug gipaubos na kini karon sa medication.
Si Dr. Sharon Azenith Laurel sa Department of Health (DOH) mibutyag nga nabantayan nila nga adunay mga piniriso sa TCJ ang nataptan og TB human sa gipahigayon nila nga mass examination sa mga piniriso.
Matud ni Laurel nga usa sa mga piniriso ang aduna’y TB ug tungod sa kahuot sa prisohan natakdan ang ubang piniriso sa maong sakit.
Ang kagamhanan sa dakbayan sa Talisay migama kini og mga lakang aron mahatagan og tabang ang mga piniriso nga nataptan og sakit.
Dugang ni Laurel nga nigahin sila og P2.5 milyones alang sa pagtambal sa mga binilanggo nga aduna’y mga sakit nga TB.
Si Chief Inspector Mary Jane Inopia, warden sa nahisgutang prisohan nagkanayon nga ilaha nang gipasul-ob og mask ang mga piniriso ug ilang gilain ang mga aduna’y sakit nga TB aron dili na makatakod pa ngadto sa uban.
Matud ni Inopia nga sa dili pa isulod sa ilang pasilidad ang mga binilanggo ipaubos pa kini sa eksaminasyon sa panglawas aron mahibaw-an kon unsa ang kahimtang niini sa naa pa kini sa gawas. (/BDB) (BANAT NEWS)