CEBU, Philippines – Dili maihap nga unang termino ang pagbalik ni Kapitan Elmer Abella sa pwesto sugod sa Hulyo 1 sa Barangay Duljo-Fatima, Dakbayan sa Sugbo.
Kini gumikan kay nihulip lang siya sa bag-ong napiling kapitan nga si Joel Ycong kinsa namatay pipila ka adlaw human sa eleksiyon samtang wala pa nakalingkod sa katungdanan.
Matud sa regional director sa Commission on Elections-7, Atty. Veronico Petalcorin, nga ang “law of succession” ang gisubay sa pag-asumer unya ni Abella balik isip kapitan sanglit siya man ang nag-unang konsehal nga napili alang unta sa sunod termino.
Si Abella anaa na sa katapusang termino isip kapitan hinungdan nga nagpapili siya sa pagka-konsehal sa niaging eleksiyon ug nahimong numero uno.
“So ang iyahang pagka-assume is through succession dili through election, so way gi-violate nga balaud kay wala man siya ma-elected for more three times sa punong barangay kun dili through succession,” matud ni Petalcorin.
Nunot niini, sa sunod eleksiyon kung magpapili si Abella sa pagka-kapitan ug modaug anha pa magsugod ang ihap sa una na sab niyang termino.
Samtang ang mabakanteng pwesto sa konsehal sugod sa Hulyo 1 ang mahulipan pinaagi sa pagtudlo ni Mayor Tomas Osmeña.
“Anybody maka-recommend, ang sanggunian maka-recommend, so it’s up for the Mayor to appoint sa kung kinsay mo-replace sa ika number 7 kay number 8 paubos pareho rana sila og apelyedo pildero,” dugang ni Petalcorin. (/GMR)(BANAT NEWS)