CEBU, Philippines – Gikatakda nga motambong si Senador Cynthia Villar sa ika-20 ka tuig nga kasumaran sa pagkamugna sa Tañon Strait Protected Seascape (TSPS) karong Mayo 25.
Si Villar ang chairman sa Senate Committee on Environment and Natural Resources.
Ang kalihukan ipahigayon sa Grand Convention Center sa Dakbayan sa Sugbo diin tukion sa Department of Environment and Natural Resources-7 ang ilang mga proyekto nga gipatuman sa Tañon Strait, ang labing dakong seascape nga giprotektahan sa Pilipinas.
Matud ni Am Prospero Lendio, protected area superintendent, nga aduna sila’y daghang plano ug mga proyekto alang sa Tañon Strait diin ilang gihatagan og pagtagad ang Biophysical Assessment, Coast Land Profiling, Law Enforcement, ug ang Communication Education in Public Awareness (CEPA).
Sunod semana aduna silay himoong kalihukan sa Lungsod sa Badian subay sa gipirmahan nga kasabutan tali sa DENR ug ni Mayor Carmencita Lumain sa pagdumala sa Lambog Beach.
“In fact, we will be installing pathways separating the coastal areas and the private property para tanan naay access sa dagat, kinsa’y gusto moadto sa dagat wala’y makaharang because of the installed pathways,” matud ni Lendio. (UV Journalism Intern/GMR)(BANAT NEWS)