2 pushers sikop sulod sa motel

CEBU, Philippines – Nasakmit ang tulo ka medium-size nga shabu ug .9mm nga armas gikan sa duha ka pushers nga nadakpan sulod sa lawak sa usa ka motel sa Sangi Road, Pajo, Dakbayan sa Lapu-Lapu alas 2 pasado sa niaging kaadlawon.

Si Senior Inspector Joel Bicoy, hepe sa Presinto 3 sa Lapu-Lapu City Police Office (LLCPO), niila sa duha nga nadakpan nga sila si Al Jeed Zapanta Bauri alyas Negro ug Marte Cuyamen Daclan, pulos hingkod nga nagpuyo sa nahisgutang lugar.

Matud ni Bicoy nga nakadawat sila og mga taho labot sa ilegal nga kalihukan sa duha sulod sa motel sa maong lugar diin magsulod ug gawas lang ang ilang mga kustomer.

Gihimo ang buy-bust operation hinungdan sa pagkasikop sa mga suspek ug nasakmit ang mokabat sa P25,000 nga kantidad sa gituohang shabu.

Laing nadakpan mao ang pusher sa Sitio Kawot, Barangay Mactan alas 7 pasado sa niaging gabii.

Si Chief Inspector Wayne Magbanua, hepe sa Presinto 2 sa LLCPO, niila sa dinakpan nga si Virginio Cañares Reponte alyas Opaw, hingkod ug on call mechanic nga nagpuyo sa maong dapit.

Nasakmit gikan sa dinakpan ang shabu nga mokabat sa P6,000. (Romeo T. Limpangog/GMR)

Nangawat og cellphone nanghulga

Sikop ang 24-anyos nga lalaki kinsa nangawat sulod sa usa ka sari-sari store sa East Poblacion, Dakbayan sa Naga.

Giila ang suspek nga si Christian Jude Go Dela Cruz, taga Tungkop, Minglanilla.

Gikawat sa suspek ang usa ka Samsung Duos nga cellphone nga kantidad og P10,000 gikan sa tulo ka biktima nga pulos mga menor de edad sulod sa tindahan.

Base sa inisyal nga imbestigasyon sa kapolisan, nisulod sa tindahan ang suspek ug pugsanong nikuha sa cellphone ug gihulga pa ang mga biktima nga patyon kung dili kini ihatag.

Daling nisibat ang suspek apan kini nadakpan dayon pinaagi sa mga trabahante sa water refilling station nga napangayoan og tabang sa mga biktima.

Samtang mobalor og P21 mil ang nakuha sa mga kawatan sa duha ka managlahing insidente sa pagpanulis ug pagpangawat sa Siyudad sa Sugbo niadtong Miyerkules sa gabii ug Huwebes sa kaadlawon.

Nagsakay sa usa ka pangpasaherong jeep si Michelle Togonon, 22, kasamtangang nagpuyo sa Talamban, dihang gitionan siya og kutsilyo sa iyang tapad nga lalaki ug gi-holdup niadtong Miyerkules sa gabii sa Escario St., Kamputhaw.

Nakuha gikan ni Togonon ang usa ka Samsung J2 Prime nga cellphone nga nagkantidad og P8,000, mga senina uban ang iyang pitaka nga adunay sulod nga duha ka ATM cards ug mga importanteng ID’s.

Samtang sa General Maxilom Avenue, Barangay Carreta nakawatan sa iyang panimalay si Arnold Omaling, 39, niadtong Huwebes sa alas 12 sa kaadlawon.

Nakuha sa mga kawatan ang Alcatel ug Cherry Mobile nga cellphones sa biktima nga mokantidad og P6,000 ingon man P8,000 nga kwarta. (Shaira Gwen T. Laluna, CNU Interns/GMR)(BANAT NEWS)