Dugang mga kapitan gikiha
CEBU, Philippines – Dugang mga kapitan sa oposisyon sa dakbayan sa Sugbo ang gipasakaan og kaso ni Mayor Tomas Osmeña tungod kay giingong wala maka-liquidate sa cash assistance gikan sa siyudad.
Niadtong Miyerkules, gikasohan ni Osmeña ang ika-tulong batch nga gilangkoban og 22 ka mga barangay kapitan. Sa miaging semana, 14 ka mga kapitan ang una niyang gipasakaan og kaso. Ang mga kapitan nga bag-ohay gikiha sa mayor mao silang; Jeremias Nuñez (Pari-an), Harry Eran (Cogon Pardo; Jerume Pagador (Bo. Luz); Pancrasio Esparis (Quiot); Maria Velasquez (Pulangbato); Restituto Atillo (Punta Princesa); Alan Masecampo (San Antonio); Cyrus Lindog (San Roque); Ramon Ylaya Jr. (Sinsin); ug Lorna Damalerio (Sapangdaku).
Lain pang kapitan nga gikiha mao silang Elmer Abella (Duljo-Fatima); Mark Rizaldy Miral (Ermita); Nunilon Monares (Kalunasan); Raquel Avila (Kamagayan); Majorita Cangmaong (Malubog); Leonilo Bontilao (Pit-os); Altea Lim (Poblacion Pardo); Joventino Ardaba (San Jose); Abraham S. Desamparado (San Nicolas Proper); Ariel Yburan (Sawang Calero); Felix Limotan (Sirao); ug Sta. Cruz Captain Eloise Marie Lim-Kasim.
Matud ni Osmeña nga ang maong cash assistance gi-disallow sa Commission on Audit niadtong tuig 2016 human wala kini moagi sa City Council aron maaprobahan.
Gibutyag ni Association of Barangay Councils-Cebu City Chapter President Phillip Zafra nga “electioneering” ang gibuhat sa mayor ug desperado na kini kay lig-on ang oposisyon karong hapit na ang eleksyon sa barangay.
Si ABC Board of Directors Altea Lim mihangyo sa mayor nga apilon usab og kiha sa mayor ang mga kaalyado niini nga wala sab maka-liquidate. Matud niya naa ra sa bangko ang P10 milyones para sa iyang barangay ug P600 mil ray nagamit niini ug gi-liquidate pa kini. (/IBM)(BANAT NEWS)
- Latest
