Kapitolyo migahin og P11 milyon sa Paglaum Scholarship
CEBU, Philippines – Mikabat ngadto sa P11 milyones ang gigahin nga pundo sa kagamhanan sa probinsiya alang sa “Paglaum Scholarship” program.
Si Bise Gobernador Agnes Magpale nagkanayon nga ang maong programa sa gobiyerno naghatag kini og oportunidad sa mga kabus, Person with Disabilities (PWDs) ug bisan sa mga drug surrenderer nga makapadayon sa ilang pag-eskwela aron sila makabaton og maayong kaugmaon.
Lakip sa mga rekisitos sa pag-aplay sa scholarship mao ang transcript of record o report card, medical certificate ug birth certificate.
Ang aplikante ipaubos kini sa interview sa napulo ka interviewer lakip niini si Magpale.
Ang mga aplikante nga dili makaabot sa passing grade o hagbong ang general average niini sa eskwelahan irekomendar kini ngadto sa Technical Educational Skills Development Authority (TESDA).
Ang madawat sa maong scholarship magdawat kini og P1,500 nga allowance matag buwan ug laing P10,000 nga tuition matag semester. Karon adunay 980 ka aplikante nga gikatakdang ipaubos sa screening.
Ang maong programa pormal nga gisugdan sa milabay’ng tuig diin 710 ka kabus nga mga estudyante gikan sa nagkalain-laing lungsod sa probinsiya ang nakabenipisyo ug sa maong gidaghanon 68 niini ang nigradwar na. (Caren Abing, CNU Interns/BDB)(BANAT NEWS)
- Latest
