Hepe sa mga tanod gidakop

CEBU, Philippines — Hepe sa mga tanod gidakop human nakuhaan og armas nga walay lisensya diha sa barangay Papan, lungsod sa Sibonga niadtong Sabado sa buntag.

Gironda sa mga sakop sa Criminal Investigation and Detection Group (CIDG)-7 inabagan sa kapolisan sa Sibonga ang panimalay sa  hepe sa mga tanod sa maong barangay nga si William Fernandez, 37.

Ang maong search warrant giluwatan ni Judge Jerry Dicdican sa Regional Trial Court branch 25, Dakbayan sa Danao.

Sigun pa ni Senior Police Officer 1 Ramon Velez, sa CIDG-7 nga adunay misumbong kanila nga magdala-dala ang maong tanod og armas maong ilang gisubay kon may pagtugot ba kini nga makabaton niini.

Nasuta nga dili kini otorisado pagdala og armas ug nakompirmar usab sa gihimong pagpaniid ang pasangil hinungdan sa gilusad nga operasyon ug nakuhaan kini og usa ka kalibre .45 nga pistola nga may serial number nga CT 4579 ug may sulod nga mga bala.

Apan ang hepe sa kapolisan sa Sibonga nga si Chief Insp. Stephen Amamag-id miingon sa Banat News nga wala sila’y nadawat nga mga reklamo batok niini.

“Wala man mi reklamo batok niya ug sa iyang tanod nga magdala-dala og armas. Bawal gyud na sa mga tanod nga modala og armas while nag-duty,” si Amamag-id miingon sa Banat News.

Sumala pa niya, kay wala’y reklamante nga miduol sa ilang buhatan wala sila’y gihimong imbestigasyon batok sa maong tanod.  Samtang usa ka suspek sa kasong robbery ang nadakpan sa Tulay 1, Barangay Cambayog, Compostela pinasikad sa warrant of arrest.

Si Senior Police Officer 2  Oliver Rondina sa Compostela Police Station miila sa ilang nadakpan nga mao si Joseph Baco  Arcelo,  35, taga Barangay Bagalnga sa nahisgotang lungsod human gimando ni Judge Fruto Teodorico III sa Branch 86 sa Regional Trial Court, Mandaue City ang pagdakop kaniya. - Romeo T. Limpangog (BANAT NEWS)