P3.5M nahatag sa TUPAD beneficiaries

CEBU, Philippines – Nikabat sa P3.5 milyones ang napangapod-apod sa Kapitolyo isip sweldo sa 695 ka benepisyaryo sa Tulong Panghanapbuhay Para sa Ating Displaced Workers (TUPAD) sa Lungsod sa Daanbantayan.

Ang TUPAD programa kini ubos sa Emergency Employment Program sa Department of Labor and Employment diin mahatagan og oportunidad ang mga informal workers nga makatrabaho sa ilang tagsatagsa ka komunidad kinsa nawad-an og trabaho tungod sa mga kalamidad.

Sila si Gobernador Hilario Davide III ug Bise Gobernador Agnes Magpale ang nangulo sa pagpanghatag nga gipahigayon sa Barangay Bakhawan Gym nga gitambungan sa lima ka konsehal sa lungsod ug mga kapitan sa barangay niadtong Abril 24.

Ang matag usa ka trabahante nakadawat og tag P333 nga inadlaw nga sweldo diin pipila kanila nakatrabaho og dili mominus sa 10 hangtud sa 30 ka adlaw pinaagi sa pagpanglimpyo sa mga publikong lugar ug pagtanum og mga         kahoy.

Gihatagan sab sila og special insurance coverage sa Government Service Insurance System sulod sa usa ka tuig.

Sagad sa mga benepisyaryo mga sakop sa women's organization, farmer's groups ug fishermen's association gikan sa 11 ka barangay sa Lungsod sa Daanbantayan. (Caren Abing, CNU Interns/GMR)(BANAT NEWS)