Deadline sa pagbayad sa SSS contributions giusab

CEBU, Philippines — Tungod sa hangyo gikan sa mga employers ug indibidwal nga miyembro, giusab sa Social Security System (SSS) ang deadline sa pagbayad sa kontribusyon gikan sa Enero hangtud Hunyo 2018.

Alang sa mga employers, gikan sa kasamtangang deadline sa petsa 10, 15, 20, ug 25 giusab na kini ngadto sa katapusan sa buwan sa nasundan nga buwan nga bayranan.

Pananglitan niini mao ang pagbayad sa kontribusyon sa buwan sa Marso 2018, ang deadline unta kay Abril 10, 2018 apan sa bag-ong lagda mahimo na kining bayran hangtud sa Abril 30, 2018 nga walay ipatong nga multa. Susama gihapon ang pamaagi sa pagbayad  sa mga self-employed ug boluntaryong mga miyembro bisan unsa pa ang katapusang numero sa ilang SSS.

Kung ang pagbayad mapakyas sa buwan sa Marso 2018 o sa Enero ngadto sa Marso 2018 nga kontribusyon sa ilang tagsa-tagsa ka deadline, mahimo gihapon nila bayran ang kontribusyon hangtud sa Abril 30, 2018.

Ang pag-usab sa iskedyul sa pagbayad gipatuman tungod sa pag-usab sa sistema sa imprastraktura ubos sa programa sa Real-Time Posting of Contributions (RTPC).

Ibalik sa SSS ang bisan unsa nga mga multa nga gibayad sa mga employer base sa kasamtangan nga deadline sa pagbayad sa  Enero hangtud sa Hunyo 2018.

Sugod niadtong Disyembre 2017, ang SSS adunay sobra sa 960,000 nga narehistro nga mga employers ug adunay 8.63 milyones nga rehistrado nga boluntaryo ug mga sellf-employed nga miyembro. (Niña Mae P. Salvacion/CNU Intern/GMR)(BANATNEWS)