CEBU, Philippines — Opisyal nga gitunol kagahapon ni Cebu City Mayor Tomas Osmeña ang dugang premyo ngadto sa mga mananaog sa Sinulog Festival 2018 sa Higantes ug Puppeteer category.
Kahinumduman nga midangop kaniadto si Analyn Cuyos, asawa sa nakadaog sa ikatulong pwesto sa Puppeteer category aron magpatabang sa mayor kay imbes P30 mil nga premyo ang ilang dawaton niadtong Enero 21, 2018 tseke nga P20 mil lang kini hinungdan nga siya mireklamo.
Si Osmeña mipadala og note ngadto kang Engr.Pericles Dakay sa Sinulog Foundation Inc. (SFI) nga nag-ingon nga pabayran ang kuwang nga P10 mil ug dugangan kini og ‘suffer compensation’ nga P10 mil.
Bisan kon P10 mil lang ang kuwang sa premyo, si Osmeña mimando nga dugangan pa og P10 mil si Cuyos ug ang ubang mananaog kinsa nalangan sab ang premyo sa paghatag .
Si Giovanni Abos, proprietor sa Sweet Life Creative Services and Events, kinsa nakakuha sa unang pwesto sa Higantes category mipaambit og mensahe ngadto sa SFI.
“Sinulog Foundation , thank you so much. It’s delayed but it is still considered a blessing. Thank you for the action,” matud ni Abos.
Dugang ni Abos dul-an sa tulo ka buwan sab nila gi follow-up ang ilang premyo. Si Konsehal Dave Tumulak miasoy nga ang dugang ganti nga ilang gihatag ngadto sa mga mananaog naggikan sa SFI. (CNU Intern/IBM) (BANAT NEWS)