Polis gi-ambush patay

CEBU, Philippines — Usa ka aktibong polis nga gikan sa Cebu City apan giingong gibalhin og destino ngadto sa Mindanao ang gipusil patay kagahapon diha sa dalan M.J Cuenco, Dakbayan sa Sugbo samtang kini nagsakay sa iyang motorsiklo, usa ka sibilyan usab ang napagan sa hitabo.

Ang namatay mao si PO1 Kenneth Flores Pogoy, residente sa Calderon Extension, Barangay Ermita ug nadestino na ngadto sa Police Regional Office-Autonomous Region of Muslim Mindanao (PRO-ARMM).

Samtang ang napagang sibilyan giila nga si Edward Hinampas kinsa naglakaw sa kilid sa dalan dihang nahitabo ang pagpamusil.

Sigun pa sa imbestigador sa Cebu City Police Office- Homicide Section nga si SPO3 Rommel Bancog gikan ang biktima sa hearing sa kaso sa drugas diha sa Cebu City Hall of Justice.

Paingon na unta kini mopauli dihang gipusil kini sa duha ka wa pa mailhing mamumuno kinsa nag-angkasanay og motorsiklo.

Giingong nakabawos pa ang maong polis sa maong mga mamumuno ginamit sa iyang kalibre .9mm nga service firearm tungod kay base sa nakuha nga basiyo sa bala diha sa crime scene adunay gikan sa bala sa .9mm nga mao usab ang armas ni Pogoy, ug ang mga basiyo sa bala sa kalibre .45 nga gituohang gikan sa armas sa mga mamumuno.

Naigo si Pogoy sa nagkadaiyang parte sa iyang lawas nga maoy hinungdan sa iyang kamatayon ug gideklarar nga patay na pag-abot sa tambalanan.

Ang sibilyan nga si Hinampas naigo sa iyang kiliran ug gidala sa tambalanan ug karon anaa na sa luwas nga kahimtang. Ang insidente nahitabo dili layo sa Waterfront Police Station.

Ang hepe sa Investigation and Detection Management Branch nga si Supt. Ryan Devaras mitataw nga personal grudge ug may kalambigitan sa iyang trabaho isip polis ang motibo sa maong krimen.

Samtang ang hepe sa Regional Intelligence Division, Senior Superintendent Remos Medina sa interbyu sa The Freeman, igsuong pamantalaan sa Banat News pinaagi sa telepono miingon nga nabalhin og destino si Pogoy tungod sa pasangil nga nalambigit kini sa ilegal nga drugas.

“He was transferred to PRO-ARMM dun nga following sa alleged involvement niya sa drugs. Pero other than that wala na akong confirmation, kasi marami ang nasa listahan we have to check it out first,” matud niya.

Sumala pa ni Medina, kadtong mga naa sa listahan dili tugotan sa PNP aron di makadugang sa problema pagsanta niining ilegal nga drugas.

Kolektahon pa sa mga imbestigador ang mga kuha sa closed circuit television cameras sa lugar aron sa pagtumbok sa mga mamumuno.

Sa laing bahin, ang tigpamaba sa Police Regional Office-7 nga si Police Supt. Reyman Tolentin mibutyag nga base sa ilang record, si Pogoy nadestino sa Cebu City Police Office (CCPO) sugod niadtong Hulyo 11 sa tuig 2012 hangtod na sa Agosto tuig 2017 ug gibalhin na kini sa PRO-ARMM.

Si Pogoy anak sa usa ka retiradong polis nga si Ret. SPO4 Samuel Pogoy kinsa  giingong mireklamo sa mga responders sa Emergency Medical Service kon nganong wala madali og dala sa tambalanan ang biktima ug mas giuna pa ang napagan nga sibilyan. (CNU Intern/IBM) (BANAT NEWS)