Lalaki gipusil patay
CEBU, Philippines – Patay ang 44-anyos nga lalake human kini gipusil sa makadaghan sa Sitio Tuburan, Punta Princesa, dakbayan sa Sugbo niadtong Biyernes sa hapon.
Giila ang maong biktima nga si Gilbert Tempura Alvarez ug nagpuyo sa nahisgutang lugar.
Sumala pa sa imbestigasyon sa kapolisan, naglakaw ang biktima sa sudlonong bahin sa maong dapit dihang gisundan kini sa usa ka lalaki.
Matud pa nga nagkalalis ang duha ug dangtan pila ka gutlo niibot og armas ang mamumuno dayong pusil sa biktima katulo ka higayon diha sa ulo ug dughan.
Human sa pagpamusil daling miikyas ang maong mamumuno.
Atol ning pagsuwat sa balita naghimo na og follow-up operation ang kapolisan, usa ka Albert Ibon Caraballe ang ilang gikostudiya.
Si Caraballe nga nahinabi sa Banat News mihimakak nga drugas ang hinungdan sa pagpusil kang Alvarez kondili panagbangi sa gang apan siya nahibulong kon nganong siya maoy gipasanginlan. (CNU Intern/IBM)
- Latest
