Diamante gireklamo sa Ombudsman
CEBU, Philippines – Gipasakaan og reklamo sa buhatan sa Ombudsman si Tuburan Mayor Democrito Diamante sa giingong paggamit sa heavy equipment sa kagamhanan sa lungsod sa pag-abuno sa yuta nga iya sa mayor sa Barangay Poblacion 1.
Usa ka Roy Pio Yap, 57, taga Barangay 3, Tuburan, ang nipasaka sa reklamo kagahapon kinsa nipasangil nga sukad pa sa niaging tuig gigamit sa mayor ang mga ekipo ug nagpadayon hangtud karon.
“Mga empleyado sa lungsod mao usab ang gigamit aron pag-operate sa mga heavy equipment ug dump trucks ilabi na sa drayber ug operators nga ilang gigamit,” matud ni Yap sa iyang suwat nga gipadala niadtong Abril 16, 2018.
Ang suwat giubanan sab og mga hulagway sa mga heavy equipment.
Si Yap nagtuo nga kalapasan sa Anti-Graft and Corrupt Practices Act ang paggamit ni Diamante sa mga ekipo alang sa personal nga katuyoan.
“Nahibalo ako nga si Mayor Diamante mao gyud ang tag-iya sa maong luna gumikan kay nagpuyo man ako sa maong barangay sulod sa taud-taud nga higayon,” matud ni Yap.
Si Yap niangkon nga paryente siya sa kaatbang ni Diamante sa eleksyon kaniadto.
Si Diamante sa iyang bahin nagdumili una paghatag og komento kabahin sa maong reklamo ni Yap sanglit wala pa siya kadawat sa kopya sa formal complaint. (/GMR)(BANAT NEWS)
- Latest
