P1.1 milyong gamit sa convention center gikawat

CEBU, Philippines – Mokabat sa P1.1 milyones ang balor sa mga gamit sa usa ka convention center ang gikawat ug usa sa mga suspek ang arestado niadtong Lunes sa gabii sa may Salinas Drive, Lahug, Dakbayan sa Sugbo.

Ang nasikop mao si Jiesse Valoria, 29, taga Sitio Maracas, Lahug, samtang wala pa nadakpi ang kauban nga si alyas “Tata” nga taga La Guardia sa mao gihapong barangay.

Ilang gikawat sa usa ka convention center ang usa ka Panasonic window type aircon nga kantidad og P35 mil, duha ka small-size sliding windows nga kantidad og P25 mil ug P40 mil, metal parts sa duha ka electric cooktop with oven nga adunay gibana-banang kantidad nga P1-million ug usa ka galvanized metal window grill nga kantidad og P5 mil.

Samtang nag-roving ang security guard nga si Zalde Villa Baguios, 59, ubos sa EROS Security Agency, iyang nasakpan si Valoria sa staff house nga giguba ang mga electric wires ug nanguha sa mga kagamitan sa maong lawak hinungdan nga iya kining gidakop ug gipahibawo sa site manager nga si Eric Dexter Yap Chao.

Sa imbestigasyon nahibaw-an nga sayo nianang adlawa nakasulod ang mga suspek pinaagi sa pagtangtang sa galvanized metal grill sa pansayan.

Ang mga gamit gibaligya sa junkshop sa may Cabantan St., Barangay Luz.

Si Valoria lang ang nibalik sa maong lugar pagka-gabii aron mangawat pa apan nasakpan.

Nakuha sab gikan kaniya ang duha ka screw drivers ug mga drug paraphernalia.

Si Valoria gidala sa Mabolo Police Station alang sa tukmang kaso nga ipasaka batok xx kaniya. (CNU Intern/GMR)(BANAT NEWS)