CEBU, Philippines - Patay ang usa ka gipasanginlang drug pusher nga dakpon unta apan namusil sa mga polis atol sa buy bust operation sa Presinto 3 sa Lapu-Lapu City Police Office (LLCPO) diha sa Sitio Orchid, barangay Looc.
Ang buy bust operation nga gipangulohan ni Senior Inspector Joel Bicoy nga miresulta sa kamatayon ni Ariel Orongan alyas Ariel Tolentino, taga Sitio Yakal, Barangay Poblacion sa maong dakbayan, samtang nakasibat ang kauban niining si Jessie Salvador alyas Kano nga taga Lungsod sa Consolacion.
Si Senior Police Officer 1 Joefrey Managase niingon dunay nakatug-an kanila bahin sa operasyon sa mga suspetsado. Apan sa pagpahigayon sa buy bust, nakabantay ang suspek nga polis ang iyang kaatubang ug miibot dayon kini og armas nga kalibre .357 ug gipusil ang poseur buyer nga polis.
Matud pa swerteng nagsuot og bullet proof vest ang maong polis ug wala makadulot ang bala hinungdan nga napusilan sa mga kaubang polis ang suspek nga si Orongan ug patay na pag-abot sa Lapu-Lapu City Hospital.
Nakuha sa crime scene ang armas nga kalibre .357, 15 ka bala niini, tulo ka basiyo, 12 ka gagmay nga putos, usa ka medium size nga putos sa gituohang shabu nga mobalor og P108 mil.
Samtang nasikop usab si Ronald Quijano, 31, nga nakuhaan og 43 ka gagmay nga putos sa gituohang shabu nga mobalor og dul-an P26 mil.
P2.5M marijuana
Sa laing operasyon, 5,460 ka mga fully grown nga Marijuana, 8,010 ka semilya nga mokabat tanan og kapin P2.5 milyones ang gilarot sa kapolisan gikan sa usa ka bakanteng yuta sa may Sitio Mapa, barangay Tagbao, Dakbayan sa Sugbo kagahapon sa kaadlawon.
Sigun pa ni Cebu City Police Office Director Senior Supt. Joel Doria ang Naval Intel Security Group- Central (NISG-C) ug ang Provincial Intelligence Branch (PIB) sa Cebu Provincial Police Office nakadawat og impormasyon bahin sa maong plantasyon sa Marijuana sa maong lugar.
Gipadala sa CCPO ang mga sakop sa City Mobile Force Company ug gipadala sab sa Philippine Drug Enforcement Agency-7 ang ilang mga operatiba aron abagan ang NISG-C ug PIB ug gilarot ang maong mga tanom.
Tungod sa kadaghan, gisunog na lang kini diha sa lugar. Walay nadakpan ang maong mga operatiba nga maoy nananom sa maong mga marijuana. (Rowena Capistrano ug Camille L. Pateres/IBM)(BANAT NEWS)