Pagpalambo sa Osmeña Peak nalangay

CEBU, Philippines — Paghan-ay sa maayong pagdumala sa turismo diha sa Osmeña Peak nakasugat og kalangay tungod sa problema bahin sa luna nga giangkon sa pribadong grupo diha sa maong bukid sa lungsod sa Badian.

Ang pagpadali unta nga maporma ang management team gihimo human sa nahitabong aksidente nga diin natagak ang usa ka turistang taga Hong Kong gikan sa kinatumyan sa maong bukid niadtong Sabado .

Matud ni Bise Gobernador Agnes Magpale ang chairman sa Provincial Tourism Commission nga buot nila nga makig tigom sila sa Department of Environment and Natural Resources (DENR) karong Biyernes uban ang stakeholders sa Osmeña Peak.

"We'll have a meeting with DENR this Friday kay remember dili mi ka full blast ngadto sa Osmeña Peak because the issue nga gi-claim sa ALU-TUCP nga 100 hectares (yuta). Ang among pangayoon nga i-exclude lang ang sa Osmeña Peak," matud ni Magpale kinsa nagkanayon nga apil niini ang 100 ka ektarya nga giangkon sa ALU-TUCP.

Matud sa bise gobernador nga usa sa ilang gitan-aw ang pagbutang og signages ug tolda sa first aiders sa maong dapit.

Si Gobernador Hilario Davide III nagkanayon nga mas maayong butangan gyud og signages ang mga tourist destination nga adunay extreme activities aron nga mapasidan-an ang mga turista. (BANAT NEWS)