Landfill susihon sa kontraktor

CEBU, Philippines — Sugod karong adlawa sugdan na ang pagsusi sa kontrobersiyal nga Inayawan landfill aron makaumol og komprehensibong plano alang sa rehabilitasyon niini.

Ang Bids and Awards Committee for Infrastructure and Consulting Services mi-isyu og notice to proceed sa kontraktor nga Full Advantage Philippines Inc. pormal nga nagbase sa Manila aron makasugod sa pagtuon sa kasamtangang sitwasyon sa maong landfill.

Ang FAPI usa ka negotiated bidder human wala’y laing kontraktor ang mipakita og interest sa paghatag og serbisyo sa City Government.

Ang maong kontrata nagkantidad og P2.5 million nga himuon sud sa tulo ka buwan.

Nagkanayon ang pangulo sa Cebu City Environment and Natural Resources kanhi Konsehal Nida Cabrera dili momenus napulo ka eksperto ang mohimo sa maong pagtuon.

Base sa kontrata ilang tan-awon ang gibag-on sa basura, gidaghanon, gilapdon, duga niini, kalidad, tubig sa ilawom, tubig sa ibabaw, mga mamunitay og basura, namuyo sa dapit, hinungaw nga gas ug kalidad sa hangin sa maong lugar.  Sila motabang sa siyudad kon unsa nga matang sa teknolohiya ang gamiton alang sa hustong paghipos sa basura, preparasyon sa mga gikinahanglang dokumento sama sa Environmental Compliance Certificate alang sa Material Recovery Facility nga pabarugon sa maong landfill.

Ang rehabilitasyon sa landfill giandaman og budget nga P52.4 million apil na niini ang initial rehabilitation, remediation ug closure plan sa facility.

Apan sa pagkakaron sigon sa pangulo sa BAC infrastructure and consulting services Atty. Evangeline Abatayo wala pa makadawat ang iyang buhatan sa Program of Works and Estimates alang sa rehabilitasyon.

Hinungdan nga dili pa sila ka schedule og public bidding sa pagka-karon. (BANAT NEWS)