CEBU, Philippines — Gihagit sa tigpamaba sa Police Regional Office 7 nga si PSupt. Reyman Tolentin ang ubang mga siyudad ug kalungsoran sa rehiyon nga sundon ang Dakbayan sa Sugbo sa paghingusog pa sa pakigbatok sa krimen.
Kini human nabutang sa Top 8 ang Cebu City sa Safest Cities in Southeast Asia base sa Numbeo nga usa ka online database diin ipakita niini ang mga sitwasyon sa tagsa-tagsa ka mga nasud sa tibuok kalibotan.
“As of the moment we are happy, ang uban cities nga wala ma-consider nga top safe, well there’s much to do. They will have to exert more efforts,” si Tolentin miingon.
Dugang sa maong tigpamaba nga aduna pay room for improvement ang maong dakbayan aron nga maangkon niini ang number one.
Nunot sa maong resulta, gipasalig sa polis nga luwas nga suroyan ang Cebu City lakip na sab ang probinsya niini.
Giingong nagpahigayon na sila og simulation exercises ug mipakatap na sa mga tourist police alang sa mga turistang modayo sa dakbayan lakip na ang probinsya sa Sugbo.
“Yes, we can assure them in fact as early as yesterday nag-conduct na ta og preparation. Eventually sure enough Cebu will be an alternative, kung wala ang Boracay,” si Tolentin miingon.
Bag-ohay lang mipagawas ang maong database og top 10 safest cities in Southeast Asia diin 50 porsiyento niini gikan sa Pilipinas ug ikawalo ang Dakbayan sa Sugbo sa maong listahan.
Nalakip sab sa maong listahan ang Valenzuela City, Davao, Makati ug Baguio. (BANAT NEWS)