CEBU, Philippines — Dili mominus sa 400 square meters nga luna ang gidonar sa lokal nga kagamhanan sa Lungsod sa Oslob nga tukuran sa bag-ong police station.
Gipirmahan nilang Oslob Mayor Jose Tumulak kauban nila ni Cebu Provincial Police Office (CPPO) Director, Senior Superintendent Edgar Alan Okubo ug Oslob Police Station chief, Senior Inspector Clemente Ceralde, ang Memorandum of Agreement ang paghatag sa luna sa Barangay Poblacion.
Mapasalamaton si Okubo sa gihatag nga suporta sa lokal nga kagamhanan sa lungsod aron matukod ang kaugalingong police station.
“From this MOA we will be submitting it to Camp Crame para ma-program at maisama sa budget sa incoming na build up na stations,” matud ni Okubo.
Si Okubo usa sa mga nanghingusog nga ang tanang estasyon sa kapolisan sa Probinsiya sa Sugbo gipanag-iya na sa Philippine National Police.
Bag-ohay lang ang lokal nga kagamhanan sa Dakbayan sa Toledo ug Dakbayan sa Tudela nag-turnover na sa bag-ong building para sa mga police stations.
Usa lang ang Oslob Police Station sa mga nag-abang og building alang sa adlaw-adlaw nga operasyon.
Nipadayag si Okubo nga sanglit wala pa’y gihatag nga budget apan moabot og kapin sa P4 milyones ang budget sa bag-ong tukuron nga police station.
Si Okubo niingon nga sa pagkakaron anaa na sila sa 80 porsyento sa mga police stations nga nanag-iya na gyud og ilang building.
Sumala pa ni Okubo nga lahi ra gyud kung gipanag-iya na sa PNP ang ilang police station sanglit dili lang kini makapanindot sa ilang imahe apan makadugang pud kini og kompiyansa sa publiko ngadto sa kapolisan.
Dako ang kalipay sa hepe sa kapolisan sa Oslob nga si Ceralde sa bag-ong progreso sa ilang gikahinaman nga kaugalingong police station. (GMR) (BANAT NEWS)