Study center sa Pardo gibuksan

CEBU, Philippines — Giablihan na ang labing unang study center nga mag-operate og 24/7 sa barangay Poblacion Pardo sa Siyudad sa Sugbo kagahapong adlawa.

Ang study center nahimutang sa second floor sa Barangay Poblacion-Pardo Market diin makasulod ang gatusan ka mga estudyante. Sa ribbon-cutting kagahapon mipahibawo si Mayor Tomas Osmeña nga dunay daghang mga study centers ang ipatukod sa managlahing barangay sa siyudad aron dunay mga kapilian ang mga estudyante kon asa sila magtuon.

Matud sa mayor nga dunay study centers nga ibutang sa Barangay Mabolo, Calamba, sa Ramos Market, sa dormitory sa N. Bacalso, sa T. Padilla Market, ug sa San Nicolas Market.

Si Elaine Tabura, usa ka medical student, mipasalamat sa kagamhanan sa siyudad tungod dili na siya moadto sa 24/7 nga Cebu City Public Library para magtuon kay duna nay study center nga duol sa ilahang balay.

“Since open ang public library, adto na gyud ko mag-study kay mahal ang coffee shops. But karong open na ang study center, anhi na ko kay convenient sa akoa kay duol ra kaayo sa amoa,” matud niya.

Malaumon lang siya nga adunay daghang mabasa nga libro sa ablihang study center.

Si City Councilor Joy Augustus Young, kinsa deputy mayor for education matters, miingon nga ang study center sa Barangay Mabolo ilusad ini’g kahuman sa Semana Santa. (IBM)(BANAT NEWS)